રાજકોટ: એક એક મતની કિંમત કેટલી હોય છે તે કદાચ રાજકોટના ભાજપના મહિલા ઉમેદવાર (BJP candidate)ને બહુ સારી રીતે સમજી ગયા હશે. 21મી તારીખે યોજાયેલી ચૂંટણી બાદ હાલ મતગણતરી (Counting) ચાલી રહી છે. જેમાં ગુજરાતના તમામ મહાનગરપાલિકા (Gujarat Municipal corporation election 2021)માં ભાજપનો ભગવો લહેરાતો દેખાઈ રહ્યો છે. રાજકોટમાં વોર્ડ નંબર 16માં ભાજપના મહિલા ઉમેદવારની માત્ર 11 મતથી જીત થઈ છે. વોર્ડ નંબર 16ના ભાજપના ઉમેદવાર રુચિતાબેનની માત્ર 11 મતે જીત થઈ છે. તેમની સામે ઊભા રહેલા કૉંગ્રેસના ઉમેદવાર રસીલાબેન ગેરીયાને 8,589 મત મળ્યા છે. જ્યારે ભાજપના રૂચિતાબેન જોશીને 8,600 મત મળ્યા છે.
રાજકોટમાં ઉજવણીની તૈયારી
રાજકોટ શહેર ગુજરાતના વર્તમાન મુખ્યમંત્રી વિજય રૂપાણી (Vijay Rupani)નું હોમ ટાઉન છે. રાજકોટમાં ભારતીય જનતા પાર્ટીની જીત થઈ રહી છે ત્યારે પાર્ટી તરફથી વિજયોત્સવની તૈયારી શરૂ કરી દેવામાં આવી છે. કાર્યાલય ખાતે ઉજવણી માટે મીઠાઈ પણ લાવી દેવામાં આવી છે. આ ઉપરાંત કાર્યકરો ઢોલના તાલે ઝૂમે તે માટેની તૈયારી કરી દેવામાં આવી છે. સાથે જ જીતને ખુશીમાં ફટાકડા પણ ફોડવામાં આવશે.
રાજકોટના વોર્ડ નંબર 8માં ભાજપના ઉમેદવારોની જીત થઈ છે. બીજી તરફ કૉંગ્રેસ અને આપ સહિતના તમામ ઉમેદવારોની ડિપોઝીટ ડૂલ થઈ છે. તો વોર્ડ નંબર 13માં કૉંગ્રેસના ત્રણ ઉમેદવારોની ડિપોઝીટ ડૂલ થઈ છે. જ્યારે કૉંગ્રેસના ઉમેદવાર જાગૃતિબેન ડાંગરની ડિપોઝીટ બચી હતી.આ પણ વાંચો: સુરતમાં આમ આદમી પાર્ટીએ ખાતું ખોલાવ્યું, વોર્ડ નંબર 16 અને 4માં પેનલની જીત
વોર્ડ નંબર 1માં ભાજપની પેનલની જીત:
વોર્ડ નંબર 1માં ભારતીય જનતા પાર્ટીની પેનલની જીત થઈ છે. ભાજપના ઉમેદવાર ડૉ. અલ્પેશ મોરજરિયા, દુર્ગાબા જાડેજા, ભાનુબેન બાબરીયા અને હિરેન ખીમાણીયાની જીત થઈ છે.
અરવિંદ રૈયારીના પાંચ વોર્ડ પૈકી બેમાં ભાજપની પેનલ જીતી:
બીજેપીના ધારાસભ્ય અરવિંદ રૈયાણીના પાંચ વોર્ડ પૈકી બે વોર્ડમાં ભાજપની પેનલની જીત થઈ છે. વોર્ડ નંબર 4, 16માં ભાજપની પેનલની જીત થઈ છે. વોર્ડ નંબર 4, 5, 6, 16, 15ની જવાબદારી અરવિંદ રૈયાણી પર હતી.
